Os independentistas manteñen o pulso a pesar de que xa ven o referendo "alterado"

Os partidos e as entidades soberanistas manteñen intacta a súa axenda de actos da campaña electoral do referendo suspendido a pesar das detencións deste mércores contra altos cargos e técnicos do Govern vinculados coa organización da consulta e das incautacións.

A mensaxe máis repetida entre partidos e entidades é que o referendo se mantén e consideran que a mellor maneira de demostralo é estar na rúa xa sexa a través de mobilizacións ou en mitins distribuídos por varios puntos da comunidade catalá.

Nunha entrevista en TV3, Junqueras recoñeceu que as intervencións policiais contra a loxística do 1-O --a incautación de nove millóns de papeletas e as notificacións aos membros das mesas electorais-- "alteran as regras do xogo" do referendo.

"As circunstancias hoxe son diferentes. A metade do equipo da Conselleria de Economía está detido", manifestou.

Precisamente, ao seu 'número dous', ao secretario xeral de Economía, a Garda Civil atribúelle un presunto delito de sedición, ademais de desobediencia, prevaricación e malversación de fondos por "xestionar elementos fundamentais" para o 1 de outubro.

"FÁCIL NON VAI SER"

O portavoz do PDeCAT no Congreso, Carles Campuzano, admitiu este xoves que non vai ser "fácil" organizar o referendo independentista anulado polo TC, pero recalcou que o compromiso do Goberno catalán coa consulta segue sendo "total".

"Fácil non vai ser", dixo nos corredores do Congreso, antes de engadir que aínda quedan "moitos días" para a data elixida e de remarcar que o presidente e o vicepresidente cataláns, Carles Puigdemont e Oriol Junqueras, aseguraron que van continuar coa organización da consulta retomando as tarefas que viñan realizado os altos cargos detidos este mércores.