Un asesor profesional para impulsar o talento individual dos santiagueses
"O Forno dos Soños", novo programa municipal de fomento do emprendemento, abre con 20 prazas.
O Forno dos Soños é un novo programa enmarcado dentro das actividades da iniciativa Compostela Móvese. O programa, que busca por en valor o talento individual e grupal das persoas que participen, comeza o 25 de setembro. As candidaturas poderanse presentar ata o día 21 deste mes.
O Forno dos Soños, tal e como explica o Concello de Santiago nun comunicado, "quere ser unha ferramenta para axudar na adaptación e a mellora da empregabilidade". O método de traballo son sesións individuais e colectivas dirixidas por un asesor profesional.
Hai 20 prazas dispoñibles. No caso de superarse este número, realizaranse entrevistas individuais para seleccionar as persoas admitidas.
DÚAS SESIÓNS ÁSEMANA
O programa dará comezo o próximo 25 de setembro e finalizará o 30 de novembro. Terá dúas sesións de traballo semanais e tres titorías individuais. Entre as actividades programadas están as de outdoor training ou de novas formas de deseño ou emprendemento, ademais das ditas sesións individuais.
O Forno dos Soños vai dirixido a persoas en desemprego que queiran mellorar ou reencamiñar a súa carreira profesional, persoas con proxectos en marcha e que non conseguen despegar e persoas que desexen aprender fórmulas de emprendemento para o futuro.
Terán prioridade na admisión as persoas de colectivos con máis dificultade no momento de poñer en marcha proxectos e iniciativas: mulleres, persoas en risco de exclusión social e persoas do rural e barrios.
Escribe o teu comentario