Juncker propón un 'superministro' europeo que dirixa a economía da Unión

A figura dirixiría as reformas estruturais dos Estados.

O presidente da Comisión Europea, Jean-Claude Juncker, propuxo este mércores crear a figura dun ministro de Economía e Finanzas da UE, que sería tamén vicepresidente do Executivo comunitario e presidente do Eurogrupo, así como un Fondo Monetario Europeo e unha liña orzamentaria concreta para a eurozona dentro do orzamento comunitario.

"Necesitamos un ministro europeo de Economía e Finanzas, un ministro europeo que impulse e apoie reformas estruturais nos nosos Estado membros", defendeu o luxemburgués en Estrasburgo durante o discurso sobre o Estado da Unión no Parlamento Europeo.

"O comisario de Asuntos Económicos e Monetarios, idealmente tamén vicepresidente, debería asumir o papel de ministro de Economía e Finanzas. El ou ela debería tamén presidir o Eurogrupo", detallou.

Segundo explicou o xefe do Executivo comunitario, este ministro europeo de Economía encargaríase de coordinar todos os instrumentos financeiros da UE que poden "despregarse cando un Estado membro estea en recesión ou sexa golpeado por unha crise fundamental" e rendería contas ante a Eurocámara.

Ademais, Juncker rexeitou a idea de crear un parlamento específico para a zona euro, co argumento de que non é necesario poñer en marcha "estruturas paralelas", ao mesmo tempo que propuxo establecer unha liña orzamentaria para a eurozona dentro do orzamento actual da UE.

Nesta liña, o xefe do Executivo comunitario sinalou que o euro "debe ser máis que unha divisa para un grupo selecto de países" e lembrou que "é a divisa da UE no seu conxunto", así como que "todos os Estados membros excepto dous" uniranse ao euro cando cumpran as condicións.

Doutra banda, Juncker opinou que o Mecanismo Europeo de Estabilidade (MEDE) debería converterse "gradualmente" nun Fondo Monetario Europeo "firmemente arraigado na UE". "A Comisión fará propostas concretas en decembro", avanzou.