O 'Pulpo Extreme' premia as deportistas con cantidades "moi inferiores" aos homes
O BNG denuncia que a proba de descenso urbano deste festival, patrocinado pola Xunta, discrimina e "cimenta as desigualdades".
A proba de descenso urbano, sinalada. Foto: Pulpo Extreme
A deputada por Ourense e responsable de Acción Feminista do BNG, Noa Presas, reclama á Xunta que retire o patrocinio ao festival de cultura urbana e deportes extremos 'Pulpo Extreme 2017', pola discriminación cara ás mulleres deportistas.
E é que, tal e como denuncia nun comunicado, as contías dos premios da proba de descenso urbano son "moi inferiores" respecto dos deportistas masculinos. A deputada non se mostra convencida coas explicacións dadas pola organización.
A organización do 'Pulpo Extreme' xustifica a diferenza nos premios polo número de inscritos en cada categoría da proba de descenso, onde só participa unha muller.
A parlamentaria advirte que se a Xunta persiste no patrocinio á competición, incorrerá no "incumprimento da súa Lei de Igualdade", polo que o BNG pedirá explicacións na Cámara galega.
A deputada cualifica de "escándalo" que a mesma proba outorgue un primeiro premio masculino dotado con 1.000 euros e o feminino só con 300. Para a nacionalista, esta discriminación "cimenta as desigualdades" e as administración públicas non poden ser "cómplices", polo que reitera que a Xunta debe tomar medidas urxentes e corrixir esta situación ou ben retirar definitivamente o patrocinio ao certame deportivo.
Por outra banda, Presas tamén denuncia discriminación lingüística ante a publicidade e información do evento "exclusivamente en castelán" a pesar de estar patrocinado e coorganizado polas administración públicas.
Escribe o teu comentario