Galicia queda á marxe da forte subida dos prezos da vivenda
Só é un 1% máis cara que hai un ano, en contraste co aumento do 5,6% que se rexistra de media en España.
O prezo medio da vivenda libre subiu un 1% no segundo trimestre de 2017 en Galicia respecto ao pasado ano, unha porcentaxe que a nivel estatal se situou nun 5,6%, segundo o Instituto Nacional de Estatística.
No segundo trimestre de 2017, todas as comunidades autónomas rexistraron taxas medias positivas no prezo da vivenda en taxa interanual, salvo Asturias (-0,3%).
Os aumentos máis pronunciados de prezos corresponderon a Madrid (+10,9%), Cataluña (+9,3%) e Illas Baleares (+7,4%), todas elas por encima do aumento medio do 5,6% para o conxunto nacional. Onde menos aumentaron os prezos foi en Murcia (+0,3%), Estremadura (+0,4%) e Castela-A Mancha (+0,8%).
TIPO DE VIVENDA
A nivel estatal, por tipo de vivenda, a taxa anual dos prezos de vivenda nova é do 4,4%, máis dun punto inferior á do trimestre anterior. Pola súa banda, a variación anual da vivenda de segunda man sobe medio punto, ata o 5,8%.
No caso de Galicia, a taxa anual de prezos de vivenda nova é do 2% mentres que a variación anual dos pisos de segunda man situáronse no 0,9%, de acordo cos datos publicados polo INE.
En taxa intertrimestral (segundo trimestre de 2017 sobre o primeiro), o prezo da vivenda libre mantívose igual. A nivel estatal, aumentou pola contra un 2%.
Só en Galicia e outras dúas autonomías cae a compravenda de vivendas
Os galegos necesitamos aforrar 27 anos para poder comprar unha vivenda
Escribe o teu comentario