Caballero, Leiceaga e Villoslada son oficialmente precandidatos ás primarias

|

VillosladaleiceagagonzcaballeroNingún militante máis deu o paso.

Gonzalo Caballero, Xoaquín Fernández Leiceaga e Juan Díaz Villoslada foron confirmados este martes oficialmente como precandidatos ás primarias do PSdeG, que se celebrarán o próximo 8 de outubro para elixir o próximo líder do partido.


E é que, como indicaron fontes socialistas, o prazo para tratar de competir polas rendas da organización pechou ao mediodía deste martes sen que ninguén máis dese o paso.


A partir deste momento, despois de que a comisión de ética validase as credenciais presentadas polos tres aspirantes, quedan por diante dúas semanas para que tenten lograr os avais de, polo menos, 1.051 militantes (un 10% do censo).


Despois, o período entre o 21 e 25 servirá para que se analicen as firmas presentadas, a fin de verificar que todas elas pertencen a afiliados coas súas cotas ao día e de que ningunha está duplicada.


CANTOS CANDIDATOS?


Será entón o momento de ver se todos eles alcanzan a barreira do 10 por cento da militancia, e se se produce algún tipo de acordo entre os aspirantes.


Sexa como sexa, aí ábrese un prazo doutras dúas semanas para que poidan visitar as agrupacións e pedir o voto aos seus compañeiros de filas, entre o 26 de setembro e o 7 de outubro.


"PALABRAS GROSAS"


Xoaquín Fernández Leiceaga, precandidato ás primarias do PSdeG, instou aos outros dous socialistas que concorren a ese proceso a "non confundir a fortaleza dunha campaña coas palabras grosas", despois das críticas intercambiadas entre Gonzalo Caballero e Juan Díaz Villoslada por mor da carreira profesional deste último.


"Eu estou a favor do xogo limpo dentro do partido, xa que creo que debemos saír deste proceso cun PSdeG máis integrado e forte", manifestou, á vez que considerou que "a mellor garantía para que isto ocorra é situar o debate no terreo das ideas e deixar outras ideas que son máis perigosas".


GALICIA, NACIÓN?


Ademais, a preguntas dos xornalistas, Leiceaga tamén se referiu ás declaracións do seu secretario xeral, Pedro Sánchez, sobre o seu concepto de España como "nación de nacións", que inclúe "polo menos" a Cataluña, País Vasco e Galicia.


"Cando cantamos o Himno, ata o presidente da Xunta di 'nazón de Breogán' na Constitución fálase de nacionalidades e no noso Estatuto somos nacionalidade histórica", apuntou, consciente de que unicamente se trata dun "debate nominalista".


Ao seu xuízo, o que debe "preocupar" é como "se insire Galicia en España" e tamén a procura dunha España "federal, solidaria, na que todos os cidadáns sexan iguais, pero na que tamén se respecte o perfil propio e a identidade de Galicia".


relacionada Villoslada e Gonzalo Caballero protagonizan o primeiro enfrontamento da precampaña
relacionada Pedro Sánchez inclúe a Galicia entre as nacións que conforman España

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress