As policías locais galegas recibirán formación en materia antiterrorista

Formación e coordinación son claves.

Policías locais en concellos galegos recibirán formación específica como parte das medidas postas en marcha no marco da loita contra o terrorismo xihadista, segundo informaron o delegado do Goberno en Galicia, Santiago Villanueva, e o vicepresidente da Xunta, Alfonso Rueda.

Fixérono tras unha reunión na Delegación do Goberno en Galicia, á que acudiron tamén o presidente da Federación Galega de Municipios e Provincias (Fegamp), Alfredo García, ademais de representantes de corpos policiais para abordar as medidas en materia de seguridade despois dos atentados en Cataluña.

Tras esta reunión, o vicepresidente da Xunta confirmou que haberá "plans específicos de formación para policías locais ante esta nova ameaza", dixo tras lembrar que a competencia nesta materia corresponde á Administración autonómica.

"Trátase dunha ameaza global que esixe unha resposta global", afirmou en referencia á colaboración entre distintos corpos policiais. A ela, referiuse tamén o delegado do Goberno en Galicia quen asegurou que o obxectivo da reunión foi "trasladar" a Xunta e concellos as medidas acordadas a nivel nacional.

Ademais, estudouse "a situación nos concellos de Galicia", dos que máis da metade contan con Policía Local. Destes efectivos, o presidente da Fegamp explicou que se lles pedirá tamén que transmitan a Policía Nacional ou Garda Civil aquela información que poidan considerar de interese.

MEDIDAS DE PREVENCIÓN

Xunto á colaboración dos corpos policiais, aos que o vicepresidente da Xunta sumou a Policía Autonómica, os tres incidiron na necesidade de mandar unha "mensaxe de tranquilidade" á cidadanía pese a actual alerta antiterrorista. Con todo, tanto Rueda como Villanueva incidiron en que "a seguridade total non existe".

"Trátase de sumar esforzos", insistiu o delegado do Goberno quen precisou que se convocarán as xuntas locais de seguridade cidadá nos distintos concellos, mentres que as mesas policiais concretarán "en que sitios se necesita máis protección".

Villanueva reiterou que xunto aos elementos fixos, como a instalación de bolardos nas zonas que se determinen, haberá "maiores controis policiais.

Na mesma liña, ratificou que a vixilancia se intensificaá en zonas "con alta concentración de persoas" como poden ser lugares onde se celebren festas. Mentres, volveu pedir a colaboración cidadá nesta materia.