Comeza o prazo de presentación de candidaturas para as primarias do PSdeG

O prazo de presentación de precandidaturas para as primarias do PSdeG arrinca este luns 4 de setembro e pecharase un día máis tarde, o martes 5.

Será entón cando se abra un prazo de dúas semanas para recoller os avais necesarios e, deste xeito, oficializar as candidaturas de cara ao 8 de outubro, data na que os socialistas galegos escollerán o seu novo líder.

Ata o momento son tres as persoas que expresaron o seu desexo de competir na carreira pola Secretaría Xeral do PSdeG: o portavoz no Pazo do Hórreo, Xoaquín Fernández Leiceaga; o seu compañeiro no hemiciclo e deputado pola Coruña Juan Díaz Villoslada e o militante vigués Gonzalo Caballero.

Os precandidatos necesitan a firma dun 10 por cento dos militantes ou, o que é o mesmo, dun total de 1.014 afiliados en base ao censo pechado a data do 1 de abril.

O calendario de primarias e congreso foi ratificado a pasada semana pola xestora do PSdeG, presidida por Pilar Cancela, quen, días máis tarde, mantivo unha reunión co secretario xeral do PSOE, Pedro Sánchez, para informalo sobre o proceso interno dos socialistas galegos.

Así, as primarias nas que se elixirá o novo secretario xeral terán lugar o 8 de outubro e o congreso do que sairá a nova dirección celebrarase do 27 ao 29 do mesmo mes.