Verín queda sen auga potable
As fortes choivas unidas á seca e os incendios provocaron o arrastre das cinzas á traída.
O Concello de Verín emitiu este luns un bando no que avisa os seus veciños de que a auga da traída non é apta para o consumo humano.
Segundo informa no escrito o alcalde Verín, Gerardo Seoane, esta situación prodúcese "como consecuencia das fortes choivas" das últimas horas e a seca existente, que provocaron un arrastre de cinzas dos terreos queimados nos incendios que afectaron ao municipio ourensán no mes de agosto, entre eles, o máis grande do ano en Galicia.
Por iso, tomouse esta decisión "en cumprimento de prevención da saúde pública", dado que a "auga de abastecemento non é apta para o consumo humano".
Así, persoal técnico atópase traballando para buscar unha alternativa e recuperar o correcto funcionamento do sistema. Así mesmo, sinálase que unha vez que se resolva o problema comunicarase aos veciños.
Escribe o teu comentario