Os concelleiros do PP de Coristanco deixan o partido para entrar no goberno

O PP provincial da Coruña suspendeu o expediente disciplinario que abrira aos seus edís en Coristanco tras apoiar como alcalde ao ex concelleiro socialista Abraham Gerpe na moción de censura presentada para desbancar ao ata o venres rexedor, Amancio Lavandeira, de Terra Galega.

Así o confirmaron a Europa Press fontes do partido, que explicaron que esta decisión se adoptou despois de que o venres, con posterioridade ao pleno e mediante un fax, os únicos edís que eran militantes do PP, Antonio Pensado e Juan García Velo, comunicasen a súa decisión de abandonar esta formación.

Antes, a dirección provincial comunicara que iniciaría un expediente disciplinario aos concelleiros por non seguir "as instrucións do partido".

FORMAR PARTE DO GOBERNO

Nese pleno, os seis edís do PP apoiaron a Gerpe, aínda que comunicando, con posterioridade, os dous militantes do partido a súa decisión de abandonalo. Agora, todos os concelleiros pasarán ao grupo dos non adscritos, segundo confirmou o ex alcalde e ata o venres portavoz municipal do PP, Antonio Pensado.

En declaracións a Europa Press, Pensado dixo que o fan "aplicando a lei antitranfuguismo". Tamén ratificou que a súa intención é "formar parte do goberno local".

Para iso, dixo que este luns se puxeron en contacto co novo rexedor, Abraham Gerpe, aínda que non quixo avanzar polo momento máis aspectos do contido da reunión.

"NON TIÑA QUE PASAR"

"O que pasou en Coristanco non tiña que pasar. Non respecta o pacto antitransfuguismo", manifestou a preguntas dos xornalistas portavoz do PSOE no Concello da Coruña, José Manuel García.

E é que, tras os cambios normativos para frear o transfuguismo, o voto dos edís que xa non se atopan nos grupos cos que concorreron ás eleccións non suma para a maioría. Con todo, o de Gerpe foi considerado válido.

García opinou que "se debería desmontar" o ocorrido no municipio de Coristanco "desde o punto de vista das reclamacións xurídicas que se van emprender por parte dos distintos partidos políticos".

"CHAPUZA LEGAL"

Desde o BNG, Ana Pontón cualificou de "chapuza legal" a moción, polo que confía en que "se revise" a decisión adoptada polo pleno e "que un tránsfuga non sexa quen goberne" o Consistorio de Coristanco.

"É inconcibible que se acabase votando, porque estamos convencidos de que esta moción foi unha chapuza desde o punto de vista legal", manifestou a líder do BNG, que asegurou que os votos do Bloque "nunca servirán para poñer en marcha unha moción cun tránsfuga" que, "no fondo", "o que quere é a volta do PP".