As augas residuais das conserveiras poden servir para producir bioplásticos
Unha investigadora da USC presenta un estudo sobre esta transformación, aínda que a tecnoloxía está aínda en desenvolvemento.
A tese doutoral da investigadora Tania Palmeiro, baixo o título 'Valorización de augas residuais salgadas: un reto para a obtención de bioproductos', aborda a produción de bioplásticos a partir de augas residuais procedentes do sector da conserva de peixe.
Segundo explicou a Universidade de Santiago de Compostela (USC) a través dun comunicado, esta investigación presentada na Escola Técnica Superior de Enxeñería avanza no estudo da transformación dos compostos orgánicos contaminantes das augas residuais.
O seu obxectivo é obter materiais con propiedades similares aos plásticos convencionais producidos a partir do petróleo.
Trátase, como destacou a USC, dun modo de "aplicar a economía circular"; unha das recomendacións que promove a Unión Europea na actualidade nun sector de gran relevancia en Galicia como o das conservas de peixe.
Finalmente, a institución académica apuntou que a tecnoloxía necesaria para completar con éxito os procesos de obtención e produción de bioplásticos a partir das augas residuais do sector conserveiro está na actualidade en fase de desenvolvemento na USC.
Escribe o teu comentario