Colectivos animalistas ven "insuficientes" as axudas a protectoras e concellos

Libera e a Fundación Franz Weber advertiron este mércores que a liña de axudas habilitada pola Xunta resulta "insuficiente" e reclaman "máis compromiso orzamentario" contra o abandono animal.

Por iso, estes colectivos advirten da "complexidade dun traballo constante e serio para erradicar o abandono animal en Galicia" e aplauden "o xesto da Xunta de publicar unha convocatoria de axudas para concellos e entidades protectoras", aínda que considera que esta achega é "insuficiente".

"A proposta do Executivo autonómico aproveitou unha modificación do teito de gasto da comunidade para vincular 300.000 euros ao desenvolvemento de campañas de sensibilización e ao coidado de animais custodiados en centros de acollida, tanto administrados por gobernos locais como por ONG, despois de sete anos sen ningunha achega destas características", sinalan.

Ademais, os animalistas subliñan o "déficit histórico que se debe liquidar".

Así, inciden en "a necesidade de que a Xunta aborde esta problemática desde un prisma amplo, conformando unha verdadeira estratexia galega contra os malos tratos e o abandono, que nos últimos anos acumula decenas de miles de animais", principalmente cans e gatos, "deixados á súa sorte en toda clase de situacións", lamentan.

Nos últimos anos FFW e LIBERA! cuantificaron que o custo do abandono de animais, é dicir, os servizos de recollida, manutención, atención veterinaria e trámites de adopción en Galicia, "supoñían unha media de tres millóns de euros para as diferentes administracións públicas".

"A isto únese que gran parte destes servizos foron externalizados, convertendo o abandono nun lucrativo oligopolio controlado por un par de empresas", critican.

Neste sentido, estes colectivos animalistas apelan á "urxencia" de aprobar a futura Lei de Benestar Animal de Galicia, que "dispoñerá de novas ferramentas que precisan de investimento público por parte do Goberno, e non só o traslado de competencias para os consistorios" que, sosteñen, "en cada vez máis casos, afrontan investimentos para mellorar os seus Centros de Protección Animal, como o caso da Coruña, ou multiplican o orzamento co obxectivo de potenciar o benestar dos mesmos, como Santiago e o seu refuxio".