Ao Celta escápalle a primeira vitoria da tempada
(2-3). Dous goles de Maxi Gómez concederon en dúas ocasións a vantaxe aos celestes, pero a Real Sociedade conseguiu darlle a volta cun penalti dubidoso.
Os de Unzué empezaron a liga con mal pé, ao ver como a Real Sociedade lle daba a volta a un partido no que se adiantaron en dúas ocasións, con goles de Maxi Gómez, pero que se lles fixo demasiado longo.
O Celta aproveitou os primeiros minutos do encontro para buscar a portería e tratar de xerar perigo, aínda que o partido comezou eléctrico, coa posesión repartida.
No 21, Maxi Gómez estreou a táboa de goleadores celestes. O uruguaio abriu o marcador aproveitando un centro pasado que Wass enviou cara á área pequena, onde rematou o dianteiro para bater a Rulli.
Co gol, o Celta veuse arriba, pero a Real soubo aguantar a presión celeste, ata que un erro de Sergio serviu para que Oyarzabal colocase o balón pola escadra e o 1-1 no marcador pasada a media hora de xogo.
Ata o descanso, continuou o partido coa posesión repartida.
Tras a continuación, sen cambios, Maxi Gómez volveu atopar o gol, ao rematar a pracer no segundo pau un rexeite nun córner.
Só un minuto despois tivo Canales a ocasión de empatar, pero o seu disparo marchou fóra. Tras encaixar o segundo, a Real colleu o mando do encontro, dando un paso á fronte, aínda que sen conseguir xerar perigo.
Pasada a hora de partido, cos cambios, o partido perdeu intensidade. Ata que a Real volveu lograr o empate. Xa o tentara cun lategazo afastado de Illarramendi minutos antes, pero Juanmi non perdoou tras recibir un pase en profundidade.
Xa na recta final a Real Sociedade lanzouse a polo partido e conseguiu arrincarlle a Jonny un penalti dubidoso para darlle a volta ao marcador desde os once metros. William José non fallou.
Escribe o teu comentario