Máis dunha decena de mortos pola caída dunha árbore nunha romaría en Madeira
Hai máis de trinta feridos, catro deles en estado grave. As testemuñas din que a árbore levaba anos en mal estado.
Polo menos once persoas morreron e outras 35 resultaron feridas, catro delas en estado grave, como consecuencia da caída dunha árbore de grandes dimensións durante unha celebración relixiosa na illa portuguesa de Madeira.
O sinistro tivo lugar nos arredores dunha igrexa da parroquia de Monte, en Funchal. Centos de persoas reuníronse con motivo das celebracións da patroa da illa, segundo a televisión pública RTP.
Varias testemuñas explicaron a esta cadea que a árbore levaba anos en mal estado e mesmo aseguraron que os veciños da zona deran aviso para que as autoridades procedesen á súa retirada. Fontes oficiais citadas polo xornal Publico tamén confirmaron que a árbore representaba un perigo.
Escribe o teu comentario