O Celta de Unzué prepara a súa reaparición en Balaídos
Udinese e Roma son os dous rivais que lles esperan esta semana. Jozabed asegura que xa se entenden mellor co novo adestrador.
O Celta axústase ao que pide Unzué. Foto: RC Celta
A Madroa volveu acoller o adestramento do Celta tras a súa expedición europea. O equipo prepara os choques desta semana ante Udinese e Roma, o mércores e o domingo.
Este luns Jozabed atendeu os medios de comunicación e aproveitou para valorar as sensacións positivas colleitadas nos días de concentración.
"Xa van tres semanas de pretemporada e esa idea de perseguir ao home xa se foi e cada vez facemos mellor a presión sen balón. Os conceptos do ano pasado están esquecidos e estamos a coller os do novo adestrador", relatou.
Destacou os cambios en defensa, xunto coa idea de "saír xogando desde atrás, asumir ese risco que creo que nos dará moitas cousas".
Ante esta impresión, o xogador declarou que "por suposto que vexo o equipo capacitado para pelexar por Europa. Non queremos falar de prioridades pero tampouco nos poñemos ningún límite".
Escribe o teu comentario