Salvamento Marítimo acode ao rescate dun veleiro francés preto de Corrubedo

Salvamar Sargadelos, noutro rescate. Foto: Salvamento Marítimo

Salvamento Marítimo mobilizou o seu helicóptero Pesca 1 e a embarcación Sargadelos para acudir á chamada dun veleiro de bandeira francesa que sufriu unha vía de auga mentres navegaba polas inmediacións de Corrubedo, en Ribeira.

Segundo informou a Europa Press o 112 Galicia, un particular alertou ao redor das 14,10 horas á central de emerxencias tras escoitar por radio a chamada de socorro da embarcación, un veleiro francés de nome 'Baligan' con tres tripulantes.

Así, Salvamento mobilizou o seu helicóptero e unha das súas embarcacións para acudir ata o lugar, situado na zona costeira de Corrubedo, no municipio coruñés de Ribeira.

Segundo o 112, descoñécese o estado dos tres ocupantes do veleiro. Desde a central de emerxencias tamén se deu aviso a Urxencias Sanitarias, Policía Local ou Garda Civil, que despregaron un dispositivo no porto de Ribeira ante a posibilidade de que a embarcación sexa remolcada ata alí.