A Embaixada española, vítima da violencia en Venezuela

Exteriores confirma que a sede diplomática sufriu un ataque con dous cócteles molotov lanzados desde unha moto, aínda que non hai danos nin feridos.

Redacción
| Venres, 4 de Agosto de 2017, 11:21

Coctelmolotov

Lanzaron dous cócteles molotov desde unha moto.

O Ministerio de Asuntos Exteriores confirmou un ataque contra a Embaixada de España en Caracas con cócteles molotov este pasado xoves, aínda que non provocou danos nin feridos, detallaron fontes do Ministerio a Europa Press.

Segundo estas fontes, o embaixador de España en Venezuela, Jesús Silva, cualificou o incidente como "menor" xa que só un dos artefactos lanzados contra a sede diplomática chegou a explotar, e fíxoo "sen danos nin feridos".

A Fiscalía venezolana abriu unha investigación para esclarecer o ataque contra a Embaixada de España en Caracas. O Ministerio Público informou en Twitter da apertura dunha investigación, despois de que varios medios alertasen dun suposto ataque con cócteles molotov contra o edificio. Os artefactos serían lanzados por persoas a bordo dunha motocicleta.

O Goberno de España anunciou que non recoñecerá a Asemblea Nacional Constituínte que será instalada este venres e coa que o presidente de Venezuela, Nicolás Maduro, quere cambiar a Constitución.