Enésimo rescate nas pozas do río Pedras na Pobra
Este xoves os bombeiros tiveron que acudir de novo á zona de piscinas naturais. O ferido tivo que ser trasladado en helicóptero.
Imaxe doutro dos rescates deste verán. Foto: Bombeiros Boiro
Un home foi evacuado este xoves polo helicóptero Pesca 1 tras caer e resultar ferido nas pozas do río Pedras, na Pobra do Caramiñal.
Segundo informou o CAE 112 Galicia, foi un particular quen informou sobre as seis da tarde de que o home sufrira unha caída nas proximidades dunha fervenza, unha zona de difícil acceso para as dotacións de urxencia.
Desde o Centro Integrado de Atención ás Emerxencias do 112 informouse ao 061-Urxencias Sanitarias, aos Bombeiros de Ribeira e aos de Boiro, a Protección Civil e á Policía Local, que participaron no dispositivo. Tamén se alertou ao Servizo de Gardacostas de Galicia.
O home foi evacuado ao Hospital do Barbanza para recibir atención médica, xa que presenta diversas fracturas óseas.
Escribe o teu comentario