A Xunta ofrécese agora a denunciar se hai exaltación franquista en Meirás

Calquera apoloxía do franquismo chegará á Xustiza.

Alberto Núñez Feijóo advertiu á Fundación Francisco Franco, que xestiona as visitas ao Pazo de Meirás, que o goberno autonómico poñerá en coñecemento da Xustiza calquera actuación que sexa detectada, tanto pola administración como por calquera cidadán, que estea fóra do marco legal.

En resposta a preguntas dos medios de comunicación ao termo do Consello da Xunta de Galicia, Feijóo lembrou que, desde o inicio da súa xestión como presidente autonómico, se lle obrigou "a cumprir a lei de principio a final" á familia Franco, obrigando a abrir o Pazo de Meirás ás visitas.

Tras a polémica xerada polo comunicado da Fundación Franco no que anunciaba que se exaltaría a figura do ditador durante as visitas ao Pazo de Meirás, Feijóo aseverou que "se a Xunta detecta actuacións fóra do marco establecido" serán postas "en coñecemento dos órganos xudiciais", instando a que calquera persoa ou asociación que teña información respecto diso o transmita ou ben á administración autonómica ou aos órganos xurídicos correspondentes.

Nesta liña, Feijóo defendeu a actuación da Xunta ao redor da cuestión do Pazo de Meirás, lembrando que rexeitou a solicitude da Fundación de asinar un convenio para colaborar no establecemento das visitas ou no mantemento do edificio.

"O único que fixemos foi dicirlle á Fundación Franco que non a que a Xunta colaborase na apertura do Pazo, non a que a Xunta financiase o mantemento e non a actividades coa Fundación Franco", remarcou.