Máis de 220 hectáreas ardidas e casas ameazadas por dous incendios forestais en Monterrei
Os servizos de extinción tiveron que actuar nas proximidades das vivendas.
Imaxe do incendio de Monterrei. Foto: @BomberoVerin
Dous incendios forestais rexistrados no municipio ourensán de Monterrei queimaron unhas 220 hectáreas. Un deles, o que se iniciou ás 17,30 horas do venres na parroquia de Infesta e arrasou 56 hectáreas, está estabilizado.
Neste incendio, aínda que a Xunta non informou desta situación, os equipos de extinción que participan nel contaron a través de Twitter que tiveron que actuar pola proximidade do incendio ás vivendas.
O outro, que comezou dúas horas despois, sobre as 19,30 horas, na parroquia de Flariz e se estendeu á de Vilaza, segundo informa a Consellería do Medio Rural, permanece estabilizado desde a tarde deste sábado e queimou unhas 172 hectáreas.
Para tratar de controlar este último lume, segundo o departamento autonómico, traballaron un técnico, sete axentes, 17 brigadas, oito motobombas, unha pa, catro helicópteros e dous avións.
O de Infesta quedou estabilizado ás 8,26 horas deste sábado tras participar nos labores para controlalo un técnico, seis axentes, 23 brigadas, 11 motobombas, unha pa, 13 helicópteros e seis avións.
Escribe o teu comentario