Os veciños de Oroso 'felicitarán' a De la Serna pola xestión da AP-9

As obras están rematadas, pero a ligazón non se abre. Foto: Concello de Oroso

O alcalde de Oroso, Manuel Mirás, advertiu de que a apertura do enlace sur da AP-9 "debería estar xa hai moito tempo" realizada, motivo polo que a localidade levará a cabo unha manifestación este venres.

Tras unha mobilización que o rexedor espera "moi numerosa", xa que "moita xente se apuntou", Mirás anunciou, en declaracións a Europa Press, que pedirá entrevistarse co ministro de Fomento, Íñigo de la Serna, coincidindo cunha visita deste a Santiago prevista para este luns.

Ese día tamén contan con convocar unha concentración na capital galega. "Ímolo ir felicitar pola excelente xestión", ironizou o alcalde.

Segundo explicou, nas obras de ampliación da AP-9, en concreto no punto de ligazón sur, "vese que fan cousas, pero logo párase e vólvese empezar", cando "debería estar xa hai moito tempo" aberto, ao seu xuízo.

A marcha de protesta para esixir a apertura do enlace sur da AP-9, en Sigüeiro, terá saída este venres desde a Praza Isaac Díaz Pardo.