Ao Deportivo atáscaselle a operación saída, non hai ofertas

Tino Fernández atendeu os medios de comunicación. Fonte: RC Deportivo

O mercado de verán recobra a calma na Coruña, tras as recentes saídas dos capitáns e as incorporacións como a de Zakaria Bakkali, que esta mañá pasou o recoñecemento médico e presentouse ante os medios de comunicación.

Nas súas primeiras declaracións, o internacional belga, que se esforzou por falar en español, mostrouse "moi contento de estar aquí, neste equipo, un gran equipo. A afección está moi ben, todo está moi ben".

Advertiu ter "catro ou cinco opcións antes que o Dépor. Pero gústame o club", do que "Fede Cartabia me fala marabillas".

Chega a Riazor co firme desexo de "xogar un pouco máis que en Valencia". E espera esta campaña poder "facer todo para competir. Temos bo equipo". A pesar de ter a selección belga no horizonte, nunha tempada ademais de Mundial, Bakkali foi rotundo: "Primeiro o meu equipo. Logo a selección".

Promete ao deportivismo "asistencias e goles". Defínese como un futbolista ao que lle "gusta o un contra un. Son moi rápido". Ademais subliña que pode xogar tanto en banda dereita coma na esquerda.

MÁIS INCORPORACIÓNS E SAÍDAS

Tino Fernández recoñeceu esta mañá que o Dépor non ten ningunha oferta por ningún xogador, fiel ao seu estilo de non adiantar o posible "interese" ata que as comunicacións son firmes.

O presidente mostrouse tallante para dicir que "ofertas non temos ningunha, non pensamos que vaia saír ningún xogador neste momento".

Unha situación á que lle resta importancia, como a incorporación frustrada do gardameta Diego Alves. "Co Valencia estaba arranxada unha solución, pero son cousas que pasan, apareceulle unha opción en Brasil que o xogador prefería e nada máis", declarou.