López Madrid desembarca en Cee para falar da venda das centrais
O presidente de Ferroglobe, á espera da autorización da Xunta, convocou unha reunión con traballadores e alcaldes da zona.
Fábrica de ferroaleación de Brens.
O presidente de Ferroglobe, Javier López Madrid, visita este luns a planta de Cee, na Costa da Morte, á espera de que a Xunta tome unha decisión sobre a petición da empresa para poder vender as centrais hidroeléctricas desta comarca.
López Madrid convocou o comité de empresa e tamén a alcaldes da zona a unha reunión á primeira hora da tarde, coa incógnita sobre a asistencia dos traballadores.
Fontes da compañía consultadas por Europa Press sinalaron que esta cita responde ao "proceso de diálogo" aberto pola firma no marco de desenvolvemento do seu plan de investimentos.
A principios de xuño Feijóo anunciou que para ese mes estaría lista a resolución, que ten que adoptar o organismo Augas de Galicia (xa que é relativa a unha concesión hidráulica).
Desde entón, a principios de xullo o persoal de Ferroatlántica en Cee e Dumbría secundou unha xornada de folga na que levaron a Santiago a súa reivindicación de que non haxa segregación das actividades (é o que permitiría a operación de venda).
Escribe o teu comentario