Yolanda Díaz asume a portavocía rotatoria de En Marea no Congreso

Yolanda Díaz e Antón Gómez-Reino.

A deputada de Esquerda Unida Yolanda Díaz asumiu este martes a Portavocía de En Marea no Congreso, en substitución do seu compañeiro de confluencia, o deputado de Podemos tamén pola Coruña Antón Gómez-Reino.

Este cambio prodúcese en virtude do acordo de rotación da portavocía que pactaron as tres forzas que compoñen En Marea --Podemos, Anova e Esquerda Unida-- cando selaron a súa alianza para concorrer nunha candidatura conxunta ás eleccións xerais.

Deste xeito, Díaz pasa a ser agora unha dos catro portavoces adxuntos cos que conta Unidos Podemos, o grupo parlamentario confederal no que se integra En Marea, e que comparte con Podemos, En Comú Podem e Izquierda Unida. Grazas a este novo posto poderá participar nas reunións da Xunta de Portavoces da Cámara.

PRIMEIRA VOLTA DA ROTACIÓN, COMPLETADA

A primeira en asumir a portavocía rotatoria foi a deputada de Anova, Alexandra Fernández, que desempeñou este papel durante a lexislatura fallida que sucedeu ás eleccións de decembro de 2015 e, despois, durante o primeiro período ordinario de sesións da lexislatura actual, que arrincou en xullo de 2016.

O pasado mes de xaneiro Fernández foi substituída por Gómez-Reino. Agora, pouco máis de seis meses despois, o deputado galego de Podemos cedeu o relevo á parlamentaria de Esquerda Unida, quen aproveitou a súa primeira comparecencia ante os medios para agradecer o seu labor ao seu predecesor.