Álex Bergantiños sae cedido ao Sporting de Xixón

Álex Bergantiños, nun adestramento.

O Dépor e o seu capitán, Álex Bergantiños, separan o seu camiño durante unha tempada, que o xogador coruñés xogará cedido no Sporting de Xixón. Este mediodía, o club herculino e Bergantiños asinaron a ampliación de contrato dun ano, que vincula ao capitán ata xuño de 2019.

Tras seis tempadas no Dépor, Bergantiños é un experto en ascensos, pois suma tres na súa conta particular e loitará polo cuarto. Unha vez máis, o xogador fai as maletas en busca de minutos.

Nunha nota publicada na súa web, o club "quere desexar a Álex Bergantiños toda a sorte do mundo nesta nova etapa profesional que vai afrontar en terras asturianas e, sobre todo, agradecerlle sinceramente a exemplar representación que exerceu para o Club en cada unha das súas aparicións, tanto deportivas coma institucionais".

Nas últimas semanas acumulou ofertas de equipos de Segunda que buscaban un seguro no mediocentro na pelexa por subir.