Galicia crea unha unidade sanitaria para atender a menores transexuais

A unidade "de referencia" estará no CHUS.

Galicia dotarase dunha unidade sanitaria "de referencia" para a atención a menores transexuais que estará situada no Complexo Hospitalario Universitario de Santiago (CHUS) e, en desenvolvemento da lei aprobada en 2014 fronte á discriminación ao colectivo LGTBI, poñerase en marcha un observatorio galego que loitará contra actitudes discriminatorias por causa de identidade de xénero.

Anunciouno o presidente galego, Alberto Núñez Feijóo, na rolda de prensa posterior ao Consello da Xunta, na que reivindicou a Galicia como a "primeira comunidade" que "consolidou" cun marco legal específico "o principio de igualdade de trato e non discriminación" para o colectivo de lesbianas, gais, transexuais, bisexuais e intersexuais.

Co obxectivo de "seguir avanzando", indicou que o seu Executivo adoptou este xoves a decisión de crear unha unidade galega de referencia para a atención a transexualidade para menores. Integraraa un equipo multidisciplinar de expertos que teñen, entre outros retos, o de "despatoloxizar a transexualidade" e a de reforzar o respecto á identidade de xénero.

Así mesmo, o observatorio galego que se creará para combater as actitudes de discriminación por identidade de xénero encargarase de realizar estudos, formular recomendacións para a aplicación de políticas públicas e impulsar campañas de concienciación, entre outras cuestións.