Gas Natural Fenosa asina un préstamo de 450 millóns co Banco Europeo de Investimentos

Gas Natural anuncia melloras na distribución e 11 novos parques eólicos.

Gas Natural Fenosa asinou un préstamo co Banco Europeo de Investimentos (BEI) por un importe total de 450 millóns de euros, que destinará a financiar parte do seu negocio de distribución eléctrica e o desenvolvemento de proxectos de enerxía renovable en España, informou a compañía.

Este financiamento do BEI contribuirá a facer posible o plan de investimentos entre 2016-2019 da distribuidora eléctrica da enerxética, Unión Fenosa Distribución, para a modernización e extensión da rede de distribución en oito comunidades autónomas españolas: Illas Canarias, Andalucía, Castela a Mancha, Castela León, Cataluña, Comunidad de Madrid, Estremadura e Galicia.

Así mesmo, a compañía presidida por Isidre Fainé destinará tamén este préstamo para financiar a construción, a través de Gas Natural Fenosa Renovables, de once novos parques eólicos nas illas de Gran Canaria e Forteventura, cunha potencia instalada total de 49,6 megawatts (MW).

A compañía destacou que, no seu conxunto, estes investimentos mellorarán o funcionamento e cobertura da rede de distribución eléctrica do país, "o que redundará en melloras de eficiencia, servizo e calidade de subministración para os cidadáns".

Ademais, os proxectos que desenvolva o grupo enerxético co financiamento do BEI, permitirán a creación de máis de 5.000 postos de traballo, directos e indirectos, durante a súa fase de implementación.

Este novo financiamento complementa as dúas emisións de bonos por importe de 2.000 millóns de euros a prazos de 7 e 10 anos realizadas durante o primeiro semestre deste ano.