A UE solicita por carta que se reabra a investigación do accidente de Angrois

O departamento da Comisión Europea responsable do transporte dentro da Unión enviou unha carta á comisión de investigación de accidentes ferroviarios (CIAF) na que a convida a reabrir a indagación que fixo polo sinistro do tren Alvia ocorrido no barrio compostelán de Angrois hai agora xa case catro anos, o 24 de xullo de 2013.

En concreto, a Dirección Xeral de Mobilidade e Transporte (DG Move) convida a reabrir a investigación "e levala a cabo con total independencia" á CIAF, órgano colexiado especializado adscrito á Subsecretaría de Fomento con competencia para a investigación técnica dos accidentes e incidentes ferroviarios.

Así o deu a coñecer a comisaria de Transportes, Violeta Bulc, nunha comunicación por escrito ao presidente da plataforma de vítimas datada este luns 3 de xullo. No escrito, ao que tivo acceso Europa Press, a dirixente comunitaria móstrase "totalmente a favor" de que se investiguen os accidentes dunha forma "independente", co fin primeiro "de que non se volvan producir".

Ademais, Bulc dá a coñecer á asociación de afectados a intención da Comisión Europea de pedir á Axencia Ferroviaria Europea un novo informe sobre a situación da aplicación da normativa da UE sobre seguridade e interoperabilidade en España. Esta medida preséntaa como "paralela e distinta" ás impulsadas ata agora.

REUNIÓN EN MADRID EN MARZO

E é que a Axencia Ferroviaria Europea (ERA, polas súas siglas en inglés) xa emitiu un duro informe crítico coa investigación realizada pola CIAF sobre o accidente de Angrois. Agora, o xuíz que instrúe a causa polo sinistro da Grandeira pediulle tamén que ditamine sobre a análise de risco, e a súa incidencia neste caso.

A titular de Transporte da Comisión dá resposta á plataforma ás preguntas que as vítimas trasladaron nunha reunión celebrada o pasado 6 de marzo en Madrid, coincidindo coa participación de Violeta Bulc nun encontro cidadán xunto ao ministro de Fomento, Íñigo de la Serna.

Xa ese día, a comisaria mostrou a súa coincidencia coas conclusións da ERA respecto do informe da CIAF. "Na miña última visita a Madrid, insistín na necesidade dunha investigación independente", lembra na carta aos afectados.

Con todo, Bulc lembra que nin a CE nin a ERA "poden substituír os Estados membro nas competencias e responsabilidades que lles atribúe a lexislación da UE", unha das cales é a investigación dos accidentes ferroviarios "graves".

O ERTMS

A maiores, a comisaria explica que a lexislación da UE "non esixía que a liña Ourense-Santiago estivese equipada con ERTMS", o sistema de control de velocidades máis avanzado, ao formar parte da rede básica da rede transeuropea de transportes, "pero non dos nove corredores desta última".

De acordo coas súas indicacións, "só será obrigatorio equipar esta liña con ERTMS en 2030", aínda que Adif dispuxo este sistema na totalidade do traxecto no seu proxecto inicial e suprimiuno unicamente dos últimos quilómetros nun cambio do documento.

De feito, os maxistrados da Audiencia sinalaron a unha carencia en canto á avaliación do risco despois da modificación do proxecto e a eliminación do ERTMS á chegada á estación santiaguesa, onde a curva obrigaba a reducir a velocidade duns 200 a uns 80 quilómetros por hora.

A CIAF PRONUNCIARASE ESTE MES

A CIAF recibiu este luns a carta e sinala que aínda é "moi cedo" para emitir un pronunciamiento respecto diso, algo para o que previamente terán que reunirse, antes de que acabe este mes de xullo, para evitar as vacacións de agosto.

Con todo, as fontes consultadas sinalan que ven pouco probable un cambio de criterio por parte do organismo. De feito, a comisión de investigación de accidentes ferroviarios non viu entón nin ve agora "ningún dato novo" que implique un cambio de opinión, máis aló da petición da Comisión Europea.

Así as cousas, a CIAF reunirase en torno ao día 20 deste mes ao seu pleno, e ese será o foro no que preparará a resposta.