O Goberno comeza a preparar as contas do próximo ano

Tras a entrada en vigor fai menos dunha semana dos Orzamentos de 2017, o Goberno aprobou o teito de gasto para o ano que vén, fixado en 119.834 millóns de euros, o que supón un aumento do 1,3% respecto ao do ano pasado. Así o anunciou este luns o ministro de Facenda e Función Pública, Cristóbal Montoro, na rolda de prensa posterior ao Consello de Ministros extraordinario.

Montoro destacou que o teito de gasto aprobado, paso previo á elaboración do proxecto de Orzamentos Xerais do Estado (PGE) para 2018, permitirá asegurar para o ano que vén a saída de España do procedemento de déficit excesivo no que leva inmersa desde 2009, algo "crucial" porque España estivo "unha década enteira por encima do 3%.

Así, explicou que o Executivo mantivo a meta de déficit público do 2,2% do PIB comprometida para 2018, repartida no 0,7% para o Estado, o 1,2% para a Seguridade Social, o 0,3% para as CCAA e o 0% para os concellos.

Para 2919, os obxectivos son dun déficit do 0,3% para o Estado e do 1% para a Seguridade Social, fronte ao equilibrio das comunidades autónomas e as corporacións locais. Para 2020, España rexistraría só un déficit do 0,5% da Seguridade Social, aínda que Montoro dixo que "non habería déficit" porque "o máis probable" é que algunha das outras administracións rexistraría superávit, e lograríase o equilibrio das finanzas públicas que son "equilibradas e saneadas".

PREVISIÓNS Á ALZA

O Consello de Ministros tamén revisou á alza as previsións de crecemento da economía española para 2017 e para 2018 e rebaixou a taxa de paro prevista para 2020 ata o 11,1%, desde o 11,2% anterior, cun número de ocupados que a finais de 2019 superará os 20 millóns de persoas.

En concreto, o Executivo elevou tres décimas, ata o 3%, a previsión de crecemento do PIB para este ano e incrementou unha décima, ata o 2,6%, a previsión para 2018, segundo o novo cadro macroeconómico 2017-2020 aprobado este luns, que servirá de base aos Orzamentos Xerais do Estado de 2018.

Na rolda de prensa posterior ao Consello de Ministros, o titular de Economía, Industria e Competitividade, Luis de Guindos, sinalou que a estimación de PIB para 2017 (3%) é "prudente e moi inferior" ás proxeccións dos analistas, que esperan para este ano un crecemento "claramente por encima do 3%". Para Guindos, tamén a estimación de 2018 (2,6%) resulta "prudente" a vista do consenso do mercado.

A "forte" inercia prevista para 2017 tamén impulsa á alza as previsións de PIB realizadas hai dous meses para anos vindeiros. Así, tras elevar unha décima a estimación para 2018, ata o 2,6%, o Goberno incrementa ata o 2,5% a de 2019, unha décima máis, mentres que mantén no 2,4% a de 2020.

As taxas de creación de emprego tamén se revisaron á alza. Espérase que o emprego, medido en termos de Contabilidade Nacional, creza este ano un 2,8%, tres décimas máis; que aumente un 2,6% en 2018, dúas décimas máis do estimado hai dous meses, e que suba ata o 2,5% tanto en 2019 como en 2020, mellorando dúas décimas o escenario previsto o pasado mes de abril para estes dous exercicios.