Unha directora xeral denuncia que o bipartito tivo un "comisariado político"

Era funcionaria neses anos. Luís Bará, do BNG, acusou á Xunta de elixir con criterios políticos os concellos que reciben axudas para proxectos ambientais.


|

Anamariadiazdirectoraxeralxunta


"Vivín o comisariado político do bipartito como funcionaria", así se expresou no Parlamento galego a directora xeral de Patrimonio Natural, Ana María Díaz, en resposta a unha pregunta do BNG na Comisión de Medio Ambiente e nunha intervención na que se mostrou "moi orgullosa" de pertencer ao PP. "Só faltaba que non estivese orgullosa!", apostilou.


Nesta comisión, o deputado do BNG Luís Bará preguntou que criterios seguiu a Dirección Xeral de Patrimonio Natural para elixir os proxectos para realizar en municipios coas axudas do período 2016-2017.


Aquí, Bará denunciou que técnicos dos servizos provinciais de Conservación da Natureza "recibiron instrucións" para "desbotar" proxectos con criterios "profesionais" mentres tiñan que tramitar outros que "xa foran denegados" en anteriores exercicios, pero que "agora parece que se queren facer pasar por proxectos dos servizos provinciais".


Respecto diso, o deputado nacionalista sostén que se tentou na provincia de Pontevedra facer pasar por propostas da Consellería de Medio Ambiente "dez proxectos realizados por concellos, algúns deles que foran rexeitados na convocatoria do ano anterior", o que ve unha "cuestión moi grave".


Bará achaca isto a que Alberto Núñez Feijóo "deu a instrución clara" de "poñerse a traballar para as eleccións municipais" tras o "trompazo tremendo" de 2015, polo que cre que "non é nada novo que teñan comisariados políticos" e "utilicen a administración ao servizo dos seus intereses".


"CATRO ANOS AMOLADOS CO BIPARTITO"


En resposta, Ana María Díaz sentenciou: "Non temos comisariados políticos, non sei se vostedes no bipartito adoitaban telos cando estaban na Xunta".


"Eu son funcionaria da Xunta e pasei catro anos amolados como funcionaria da Xunta naquel entón", afirmou, antes de apostilar: "Son funcionaria de carreira e, si, vivín o comisariado político do bipartito como funcionaria".


Neste punto, mostrouse "moi orgullosa" de ser do PP, que "non é revanchista nin sectario". "Reto a que diga quen é o técnico que di que Ana María Díaz dixo que prevalecesen eses proxectos", aseverou.


UN TOTAL DE 33 SOLICITUDES APROBADAS DE 134


Ademais, Ana María Díaz informou de que houbo un total de 33 solicitudes aprobadas das 134 presentadas para axudas co fin de realizar actuacións en Rede Natura no período 2016-2017.


Así, asegura que esas solicitudes "non foron aprobadas baixo un criterio político", e relatou os nomes dos municipios con subvencións á fronte dos que están diversos partidos. "Non se mirou a cor política", resolveu.


De tal forma, apunta que a maioría dos municipios que quedaron fóra das axudas nunha orde de concorrencia competitiva foi porque "se esgotou o crédito orzamentario", xa que "a maior parte expuxeron actuacións elegibles" en Rede Natura.

1 Comentarios

1

¿Non era esta a que tivo un problema laboral cunha traballadora sen seguro ou algo así? O máis curioso e que daquela estaba na consellería de traballo. Preguntade por ela en Valdoviño e Ferrol e poñeranvos ao día.

escrito por Luis 05/Xuñ/17    18:09 h.

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal - Política de Cookies - Política de Privacidade - Configuración de cookies - Consello editorial - Publicidade
Powered by Bigpress
CLABE