Tal día como hoxe nacía Luís Seoane, un artista "total"
Baixo o título 'Episodios dunha vella historia', a Fundación do artista réndelle homenaxe este xoves cun recital-concerto de poemas seus.
"Pintor, gravador, editor, deseñador gráfico, muralista, escenógrafo, poeta, narrador, guionista, ensaísta, comunicador en prensa escrita e radiofónica, crítico e teórico das artes". Así describen desde a Fundación Luís Seoane a unha das figuras máis importantes da arte e da cultura galegas de todos os tempos no 107 aniversario do seu nacemento.
Baixo o título 'Episodios dunha vella historia', a Fundación renderá este xoves ás 20,30 horas unha homenaxe ao artista con un recital-concerto no que o actor Santiago Fernández e o músico Sergio lópez interpretarán poemas de Seoane.
Segundo a organización, trátase dunha homenaxe a un artista "total". "Ao seu compromiso coa súa terra", engade. Ademais, sinala que será unha oportunidade "para achegarse á vertente máis política de Seoane, sen a que a súa obra non podería entenderse".
Na homenaxe, poñerase voz e música "a unha coidada selección de textos" en base á adaptación por parte do escritor e director do estudo de teatro Casahamlet, Santiago Fernández, de 15 poemas do artista galego.
Destes poemas, a Fundación Luís Seoane destaca os temas que aborda o autor "como a emigración, a loita de clases, a ausencia de xustiza para os máis desfavorecidos, o fracaso individual e colectivo ou os estragos do capitalismo salvaxe".
Escribe o teu comentario