Lucas Pérez ten todos os boletos para saír do Arsenal no verán

O futuro de Lucas Pérez parece que estará a próxima tempada lonxe do Arsenal. Segundo Coruña Deportiva, o xogador coruñés xa lle dixo ao club británico que ten intención de saír neste mercado de verán en busca de minutos ante a barreira que supón a renovación de Arsène Wenger.

E é que as aspiracións do dianteiro pasan por tentar convencer a Lopetegui de que merece un oco no combinado que xogue o próxmo Mundial, en Rusia. Un dos candidatos é o Dépor. Tanto o xogador como o club herculino deixaron sempre a porta aberta a volver compartir camiño e ambas as partes se ven como a primeira opción. Con todo o aspecto económico complica a operación.

Aínda que o Arsenal non vai poñer trabas para a saída do xogador, tampouco o vai regalar, polo que o destino de Lucas Pérez pode estar tamén lonxe da Coruña.

Ao parecer, o Sevilla xa empezou a tentear a posible incorporación do dianteiro polo que xa pelexou o verán pasado. Ten diñeiro e un posto na Champions, argumentos de peso para facerse con case calquera xogador.