É oficial, Juan Carlos Unzué asina por dúas tempadas co Celta
O adestrador regresa ao club celeste, onde xa foi segundo técnico de Luis Enrique na campaña 2013/2014.
O Celta anuncia a chegada de Unzué. //Fonte: RC Celta
Juan Carlos Unzué encabezará o corpo técnico do Celta as dúas próximas tempadas. Tal e como confirmou o club vigués a través da súa web, o adestrador navarro regresa ao banco celeste como adestrador tras ocupalo como segundo técnico de Luis Enrique na campaña 2013/2014.
Con el, volven ao Celta Robert Moreno, segundo adestrador, Rafel Pol, preparador físico, e Joaquín Valdés, psicólogo, todos eles "integrantes daquel corpo técnico celeste que propiciou o despegamento do club en Primeira División".
Juan Carlos Unzúe regresa tras unha etapa no FC Barcelona, onde, como segundo adestrador, sumou nove títulos nas tres últimas tempadas.
O técnico navarro compartiu banco e experiencias con grandes adestradores, comezando no ano 2003 con Rijkaard e continuando con Guardiola e Luis Enrique. Como primeiro técnico, dirixiu o Numancia no ano 2010. O novo corpo técnico será pesentado durante os próximos días.
Escribe o teu comentario