Máis de 1.000 menores atópanse nunha situación de acollemento en Galicia
No Día Internacional das Familias, a administración autonómica avoga por "garantir o dereito de todo menor a ter unha familia".
A Xunta mostra o seu apoio ás familias galegas que acollen nenos en situación de desamparo, especialmente na xornada deste luns 15 de maio, na que se conmemora o Día Internacional das Familias.
Este compromiso, asegurou o Goberno galego nun comunicado, reflíctese nunha subida do "nove por cento" con respecto ao ano 2016 na partida económica destinada a estas familias ata chegar aos "2,4 millóns de euros".
O obxectivo é "garantir o dereito de todo menor a ter unha familia". Trátase dun investimento inicial, tendo en conta que "se pode ampliar para poder atender a todos os menores que o precisen".
Na actualidade, 1.023 menores atópanse nesta situación de acollemento en familia extensa e 225 en familia allea, tal e como precisou a Xunta.
Escribe o teu comentario