O PP denuncia que o Concello de Vigo debe "un ano" de facturas de luz de Balaídos

|

Obrasbalaidos


O Partido Popular de Vigo denunciou que o Concello olívico "non está a pagar a luz" do estadio municipal de Balaídos, e, en concreto, sostivo que ten "varias facturas pendentes" e debe "preto dun ano".


Así o trasladou este luns nunha rolda de prensa o concelleiro popular Miguel Fidalgo, que asegurou que hai "varios avisos para cortar a luz" emitidos pola compañía eléctrica. "É o concello o que ten que pagar a luz, e non se pagan as facturas", mantivo.


Neste marco, explicou que nas actuais "relacións tensas" entre o RC Celta e o Concello de Vigo e tras a "serie de cambios no convenio", polos que "o mantemento do céspede antes asumíao o Concello e agora o propio Celta", o club de fútbol non "quere pagar a luz porque lle corresponde ao Concello".


Ao ser cuestionado por este tema nunha rolda de prensa posterior, o segundo tenente de alcalde, David Regades, rexeitou facer declaracións e limitouse a dicir que o alcalde é quen informa de todo o relativo a Balaídos, e que, en todo caso, "non é o momento agora" de falar do estadio. "Non imos enturbar un momento tan importante para a cidade con estas cuestións", selou.


PROPOSTA DO PP SOBRE BALAÍDOS


En relación ao conflito entre o Goberno local e a directiva do Celta, a portavoz do PP no Concello de Vigo, Elena Muñoz, presentou este luns unha proposta que pasa por que o Celta asuma o control e o 100% do financiamento das obras que quedan pendentes en Balaídos, e, a cambio, o club reciba a concesión administrativa sobre o estadio.


Con iso, sinalou que se conseguiría, por unha banda, que a reforma do campo de fútbol sexa "a que necesita o Celta e non un lavado de fronte"; doutra banda, "liberar diñeiro público" para outros fins; e finalmente, garantir a permanencia do club "en Vigo e en Balaídos". "É unha proposta de sentido común, razoable", considerou a edila.


Nesta liña, recalcou que o presidente do Real Club Celta rexeitou a última proposta do Goberno local de concesión do estadio de Balaídos por 50 anos "nos termos actuais", e aventurou que, se incluísen estes cambios, garantindo que a reforma sexa a que se expuxo e que sexa o club o que "a lidere", poderíase "asegurar que o Celta queda en Vigo".


Así as cousas, reclamou que o alcalde "non dilate máis unha resposta, dea a cara e poña solucións encima da mesa", porque "non pode haber silencio" respecto da "preocupación" dos vigueses.


"As obras foron o desencadenamento do divorcio entre o Celta e o Concello, e este divorcio que non pode seguir existindo", concluíu Fidalgo.

relacionada Abel Caballero culpa a Feijóo de que o Celta se vaia de Balaídos
relacionada A Xunta recibiu un "asesor do Celta" e representantes de Mos para tentear un proxecto de estadio
relacionada O plan de Caballero para convencer a Mouriño: ceder Balaídos por 50 anos

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress