A CIG denuncia o "serio" estado de abandono das salas de autopsias de Vigo

|

Camillamuertoautopsia


Carros de roupa sucia nos corredores por onde entran e saen os cadáveres, unha sala de autopsias que colinda coa cociña do hospital, carencia de sinais, falta de ventilación e zona intermedia para o persoal forense ou vestiarios sen diferenciación por sexos, pasando por unha mesa non regulable en altura que os traballadores 'adaptan ás súas necesidades' como ben poden. Son algúns dos escollos que os auxiliares de autopsia e médicos forenses teñen que sortear no seu labor diario na sala pública de autopsias de Vigo sita no obsoleto Hospital Nicolás Peña, segundo denuncia nun comunicado a CIG-Xustiza. 


O sindicato detectou estas anomalías no marco dunha vista do Servizo de Prevención de Riscos Laborais ás salas onde se realizan as autopsias de Vigo, concretamente as do Tanatorio Vigo Memorial --de xestión privada, que recibiu unha inspección favorable--, e ao Hospital Nicolás Peña, unha instalación pública xestionada pola Xunta. 


"A problemática é que durante moitos anos as instalacións do Nicolás Peña foron adaptadas, como se adoita dicir, 'daquela maneira', e o que antigamente era unha sala mortuorio --de preparación de cadáveres para os servizos fúnebres--, acabou converténdose nunha mala sala de autopsias", defende o delegado sindical da CIG Xustiza, Xosé Barreiro Pérez. 


Neste sentido, Barreiro advirte que, tras a súa visita ás instalacións do hospital, detectáronse unha serie de problemas entre os que destacan ata unha ducia, e polos cales considera que as instalacións "deberían estar pechadas e sancionados os responsables da administración por mantelas neste estado". 


NUMEROSAS DEFICIENCIAS


En primeiro lugar, Barreiro destaca que "os carros de lencería sucia transitan e almacénanse temporalmente no mesmo corredor por onde entran e saen os cadáveres". Ademais, a sala de autopsias "linda coa cociña", polo que os residuos de cociñar quedan almacenados en colectores localizados na mesma zona por onde entran e saen os coches fúnebres cos defuntos. 


O acceso á sala de autopsias carece de sinalización, polo que se instalou "unha cadea" na porta do corredor de acceso e dependencias, que fai que só se poida desbloquear desde dentro. A iso súmase que a sala de autopsias "carece de atmosfera negativa e campá estractora" para os vapores do formol, motivo polo que se utiliza unha xanela que dá acceso a un camiño público, unha solución 'caseira' ao tema da tan necesaria ventilación da estancia. 


Para máis inri, "non existe unha zona intermedia entre sala de autopsias e o corredor de acceso de cadáveres", polo que os médicos e auxiliares teñen que, ou ben saír coas batas e calzado de traballo, ou ben quitalas na propia sala de autopsias. 


A estes problemas súmanse outros como a falta de sala de húmidos-sala de mostras, que a mesa de autopsias non é regulable en altura --polo que o persoal vese obrigado a utilizar chanzos para suplir esta carencia--, que as cámaras frigoríficas non se adaptan correctamente á padiola, a ausencia de guindastre para mover cadáveres ou de vestiarios diferenciados por sexo, todos eles enumerados pola CIG no seu escrito. Outras cuestións que tampouco quedan totalmente claras son se o persoal de limpeza cumpre efectivamente co protocolo para o correcto saneamento deste tipo de estancias ou se a instalación eléctrica obedece á regulación pertinente.


"INSTALACIÓNS ACORDE COS TEMPOS"


No seu escrito a CIG insta a Alfonso Rueda, Vicepresidente e Conselleiro de Xustiza, a que proporcione a Vigo "unhas instalacións propias e acorde cos tempos nos que estamos e con previsión de futuro". 


Afirman que desde a xunta de persoal pediron a Rueda, na Comisión de Seguimento das Obras da Cidade da Xustiza, que todo o Anexo I albergase a sede da Subdirección do Imelga, con todas as instalacións inherentes ao mesmo, entre as que se atopan as salas de autopsia e cámaras frigoríficas. Ademais, incluían a petición de que o Ministerio de Xustiza incluíse tamén neste anexo unha sede desprazada do Instituto Nacional de Toxicoloxía que dese servizo ao noroeste peninsular. Con todo, en declaracións recentes, e segundo o comunicado emitido polo sindicato, Rueda afirmou que a localización podería "non ser do todo correcta", polo que Barreiro lamenta que "ao final todo quedará como está na actualidade". 


Neste sentido, a CIG reclama que "os nosos mortos teñan o trato que corresponde coa seriedade do labor realizado polos médicos forenses e auxiliares de autopsias". 

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress