Puy destaca a "valía persoal" de Leiceaga se opta a liderar o PSdeG

|

Leiceagapuy


O portavoz parlamentario do PP, Pedro Puy, asegurou que o seu homólogo no grupo socialista, Xoaquín Fernández Leiceaga, desempeñaría un hipotético rol como secretario xeral do PSdeG "con responsabilidade e grandes doses de acerto".


Nunha entrevista na Radio Galega este domingo, Puy indicou que coñece a Leiceaga "desde hai anos porque é compañeiro na universidade" e, por tanto, sabe da "súa valía persoal".


"Estou seguro que calquera cargo ou misión ou traballo que se lle encargue faríao como fai todo, con responsabilidade e grandes doses de acerto", manifestou Puy ante a pregunta sobre a posibilidade de que Leiceaga opte á Secretaría Xeral dos socialistas galegos no congreso autonómico que podería celebrarse nos próximos meses.


ORZAMENTOS ESPAÑOIS


En canto á actualidade política a nivel estatal, o portavoz parlamentario do PP expresou que os Orzamentos Xerais do Estado (PGE) presentados polo Goberno español son "bos para darlle estabilidade ao crecemento económico que está a experimentar España".


Así, logo de que o PP alcanzase un principio de acordo co PNV para que os nacionalistas apoien as contas a cambio dunha rebaixa na cota e o compromiso de aumentar os investimentos no País Vasco, Puy abriu a porta a sumar aos socialistas na negociación unha vez "resolvan os seus problemas" e conten con "un liderado consolidado".


En canto ás partidas destinadas a Galicia nos PGE, criticadas polos grupos da oposición no Parlamento galego por ser as máis baixas "en anos", o portavoz popular indicou que é "a segunda comunidade autónoma en termos 'per cápita' que recibe investimentos do Estado".


"Non sería bo que por falta de orzamentos se frease ou se detivese porque xa o ano pasado comprobamos que un exercicio sen orzamentos detén o investimento público, detén a capacidade de continuar mellorando as cousas", manifestou.


LEXISLATURA EN GALICIA


Puy percibe no arranque deste lexislatura un ambiente diferente no Parlamento galego. "Na pasada lexislatura había algún deputado que mesmo exercía a portavocía dalgún grupo da oposición que non mantiña as formas parlamentarias", indicou.


"A relación en liñas xerais nesta lexislatura no ámbito de debate, de organización da propia cámara, é máis razoable e as diferenzas políticas como é natural seguen sendo as mesmas", apostilou.


ELECCIÓNS FRANCESAS


En canto ás eleccións presidenciais francesas que celebran a súa segunda volta este domingo, o popular mostrou a súa esperanza en que o candidato de 'En Marche!', Emmanuel Macron, venza á candidata da Fronte Nacional, Marine Le Pen.


E é que, para Puy, o triunfo da "extrema dereita proteccionista" de Le Pen "prexudicaría" a Galicia e, en cambio, unha vitoria de Macron supoñería "un novo empuxe" para os "vellos principios" demócratas "que veñen moitos deles da Revolución Francesa".

relacionada Leiceaga pide paz entre Carmen Santos e o PP para devolver a normalidade ao Parlamento
relacionada Leiceaga rexeita desgastar o PSOE galego con cambios na xestora
relacionada Puy, sobre a sucesión de Feijóo: "É coma se me preguntase se vai chover en agosto de 2018"
relacionada Pedro Puy desmarca o PP galego das "denuncias por corrupción"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress