Galicia recuperou os valores do PIB que había antes da crise
A cifra alcánzase un trimestre antes do previsto. Facenda valora a importancia dos fondos europeos no desenvolvemento galego.
O conselleiro de Facenda, Valeriano Martínez, avanzou este venres que Galicia recuperou no mes de marzo os valores nominais "precrise" do PIB, de modo que o dato chega cun trimestre de antelación.
Durante a súa intervención na inauguración dunha xornada no Parlamento sobre 'A incidencia da adhesión á UE', Martínez puxo en valor que o Goberno galego logrou "recuperar" en tres anos "o PIB perdido nos seis anteriores".
Así mesmo, sinalou que se a comunidade mantén esta evolución, que será confirmada polo Instituto Galego de Estatística (IGE), o actual exercicio pechará con "un record absoluto" no PIB nominal. "Mesmo chegaremos a superar os 60.000 millóns de euros por primeira vez na historia de Galicia", salientou.
Tras recalcar a importancia que tiveron os fondos comunitarios no desenvolvemento da nosa terra, o alto cargo da Xunta tamén puxo o foco na "recuperación do emprego", baseándose na melloría que rexistra o último dato do paro.
Neste punto, lembrou o "reto ambicioso" que o Executivo autonómico ten por diante: crear entre 80.000 e 100.000 postos de traballo nesta lexislatura.
CONVERXENCIA CON EUROPA
Adicionalmente, coa vista posta no desafío de lograr que o PIB per cápita galego alcance o 88 por cento da media europea en 2020, o titular de Facenda sostivo que os traballos van "pola senda correcta". A modo de exemplo, referiu que en 2016 Galicia "creceu case o dobre que a media europea".
Dito isto, destacou o crecemento "san" da comunidade, que derivará en que "sairá da crise mellor preparada" para afrontar o futuro.
Por último, despois de cifrar nuns 23.000 millóns de euros os fondos que as instancias comunitarias deixaron en Galicia, Martínez apuntou que estas axudas non só contribuirán a mellorar a converxencia de Galicia con Europa senón tamén a "afrontar con maior compromiso" a crise demográfica.
Escribe o teu comentario