Feijóo fai legal o ilegal e provoca un "efecto chamada" a plantar eucaliptos
ADEGA critica a proliferación de novas plantas de biomasa tras a decisión da Xunta de eliminar os límites de potencia que fixaba a lei.
A eliminación dos límites de potencia para plantas de biomasa levada a cabo polo Executivo de Feijóo está a provocar un "efecto chamada" a instalar centrais que hai poucos meses eran ilegais. A asociación ecoloxista ADEGA critica a manobra da Xunta que deu lugar a esta proliferación.
Así, ADEGA sinala nun comunicado un "clarísimo exemplo de como unha administración lexisla a favor dos intereses empresariais do 'lobby' pasteiro-enerxético". E é que volve estar sobre a mesa un proxecto para unha planta de biomasa similar a outro que a Xunta comezara a tramitar cando aínda incumpría a norma. Así, a central de 50MW pensada para Curtis volveuse presentar desde outra empresa, pero que a asociación ecoloxista mostra que está promovida pola mesma persoa.
Por iso, ADEGA sentenza que o proceder do Executivo galego se resume en: "se unha instalación non é legal, cámbiase a norma e arranxado".
MÁIS EUCALIPTOS
Este caso que relata a asociación ecoloxista ilustra a súa crítica ao que cualifican de "efecto chamada" á promoción de plantas que "necesitarán inxentes cantidades de madeira para queimar".
Segundo os seus cálculos "só as dúas plantas de 50MW en tramitación (a de Greenalia citada antes e outra de ENCE) requirirían queimar cada ano máis de 1,2 millóns de toneladas de madeira (entre 20 e 25.000 hectáreas).
Por tanto, ADEGA augura que "a utopía de ENCE está moi próxima a se consumar: ter medio país producindo eucalipto para pasta e outro medio, madeira para queimar". A consecuencia, unha Galicia convertida nun "deserto verde, un ermo ecolóxico e demográfico".
Escribe o teu comentario