Reimplantan en Vigo a súa man a un traballador que a amputou nun accidente

|

Reimplantemanopovisa


O equipo de Cirurxía Plástica e Reconstructora do Hospital de Povisa, en Vigo, reimplantou "con éxito" unha man a un albanel e carpinteiro de 53 anos, Jesús Lago de la Fuente, que a perdeu nun accidente laboral a pasada Semana Santa, cando a máquina de cortar madeira que manipulaba lle seccionou a palma da man esquerda deixándolle só o pulgar.


Tal e como informou o hospital, o paciente, que traballaba na noite do Venres Santo no seu taller situado na localidade lucense das Nogais, logrou manter a calma suficiente para pedir axuda aos seus familiares e indicarlles que metesen a súa extremidade perdida en xeo ata a chegada da ambulancia.


Inicialmente, o home foi trasladado ao Hospital Universitario Lucus Augusti (Hula), pero ao cabo dunhas horas foi derivado a Povisa, onde foi intervido na mañá do sábado durante sete horas polo equipo que dirixe o doutor Enrique Moledo, que puido reparar e unir veas, arterias, tendóns flexores e extensores, nervios e músculos da man.


A intervención, asegurou o hospital --que realiza uns 50 reimplantes de "enorme complexidade" ao ano e está "altamente especializado" en micro e macro reimplantes--, resultou "un éxito" e, aínda que o paciente precisará dun longo período de rehabilitación, tres semanas despois do accidente "xa pode mover lixeiramente os dedos" e prevese que sexa dado de alta este sábado.


REIMPLANTE DUN BRAZO EN 2016


Con iso, equipo de Cirurxía Plástica e Reconstructora de Povisa "volveu protagonizar un fito médico", que se suma ao realizado o pasado ano, cando un equipo multidisciplinar logrou reimplantar a un mozo, Óscar González, o brazo que se seccionou coas pas dunha amasadora de formigón.


Povisa indicou que a día de hoxe Óscar González, que no momento dos feitos estaba a traballar nas obras do AVE no municipio ourensán de Laza, "fai vida normal e é capaz mesmo de cargar pesos co brazo operado".

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress