En Marea súmase á petición do BNG de analizar os contratos da Xunta con Villar Mir

|

Ferroatlanticaprotestaceevillares


O BNG volveu insistir este martes na conveniencia de que unha comisión parlamentaria investigue os contratos e concesións da Xunta ao grupo de empresas Villar Mir, cuxo propietario está imputado na operación Lezo, e iniciou "contactos" con En Marea para pedir a apertura deste órgano. Pola súa banda, o PSdeG condicionou o seu apoio á existencia de "indicios" e o PP deixou claro que non admitirá "ventiladores preventivos".


Na súa rolda de prensa posterior á xunta de portavoces, a representante do Bloque, Ana Pontón, puxo o foco na posible "venda ilegal" das centrais do río Xallas a Ferroatlántica, un asunto que tamén tratará de introducir na pregunta ao presidente do próximo pleno. Ao fío diso, amentou as "cuantiosas concesións públicas" das empresas de Villar Mir coa administración autonómica e advertiu que algo "cheira mal".


É por iso que, como revelou o portavoz de En Marea, Luís Villares, na súa posterior comparecencia ante os medios, os nacionalistas (que non teñen o número mínimo de deputados para propoñer a comisión de investigación) iniciaron conversacións co seu grupo. Este órgano, dixo, ten "unhas facultades limitadas", pero podería servir para motivar "cambios" nos comportamentos da administración a partir de agora.


E é que, desde a óptica do maxistrado en excedencia, existe "unha conexión evidente" entre "o financiamento ilegal do PP" por parte de certas empresas con "favores para devolver" en calquera punto da xeografía española. É por iso que secundou "estudar con lupa" eses contratos, á vista, por exemplo, da posición "ambigua" da Xunta no relativo á venda ilegal das mencionadas centrais hidroeléctricas. "Hai algo raro", apreciou.


"POLÍTICA-ESPECTÁCULO" DO BNG


En cambio, o portavoz do PSdeG no Pazo do Hórreo reflexionou sobre que "hai que ser duros e belixerantes" cos casos de corrupción, pero tamén "moi precisos" para evitar que a acción parlamentaria da oposición "se devalúe". Neste punto, recoñeceu a súa estrañeza pola nova "querenza do BNG pola política-espectáculo", que parece "aprendida" --dixo-- doutras formacións.


Ademais, cargou contra "o avance do populismo" nos procedementos parlamentarios, pois o "sensato" antes de propoñer ante a prensa unha comisión de investigación sería facer "un traballo previo" que xustificase a apertura deste órgano. "Se existen datos ou indicios, nós seremos os primeiros a favor de investigar", sostivo, para rebater con iso a Pontón que o PSOE teña "unha especie de síndrome de Estocolmo co PP".


Nunha liña similar, desde filas populares, Pedro Puy pediu saber "exactamente que queren investigar", posto que o seu grupo non se prestará "a este xogo de salpicar con todo a todo o mundo se non hai unha sospeita de que haxa algunha irregularidade". "Non imos xogar a esa especie de política do ventilador preventivo no que parece que están algúns grupos desta Cámara interesados", resolveu.

relacionada Ana Pontón agarda que a "corrupción do PP" non "salpique a Galicia"
relacionada O BNG pide unha comisión de investigación sobre as adxudicacións ao grupo de Villar Mir

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress