Villares desdise da súa crítica a Podemos por acudir a JpD

O portavoz de En Marea, Luís Villares, rectificou este luns e sinalou que ve "pertinente" que Podemos acudise a Jueces para la Democracia, despois de afirmar que "sobraba" a petición de reunión para que esta asociación asesorase o partido na moción de censura a Rajoy.

En declaracións aos medios de comunicación este luns en Vigo, coincidindo coa súa participación na marcha polo 1 de maio, Villares aproveitou para "matizar unha cuestión" en relación á moción de censura anunciada polo líder da formación morada, Pablo Iglesias.

Respecto diso, o portavoz de En Marea dixo que avalía "moi positivamente como Podemos se dirixe a todos os medios sociais e a todos os interlocutores sociais".

"Primeiro para socializar e expoñer os motivos da moción de censura e, en segundo lugar, solicitar a información dos colectivos profesionais que saben máis do tema e que están máis informados sobre cales son as necesidades concretamente tamén en materia de xustiza", expuxo.

Nesta liña, valorou, agora, que "dirixirse ás asociacións xudiciais é unha aposta sempre oportuna". "Na medida en que queremos escoitar a cidadanía organizada e queremos escoitar a todos os colectivos sociais", precisou.