O PSOE pide que as excedencias para o coidado dos fillos computen como horas traballadas
Consideran unha "inxustiza" e contrario á Lei de Igualdade que os funcionarios que piden estes permisos perdan méritos nos concursos.
O PSOE presentou no Congreso dos Deputados unha proposición non de lei para que se garanta que nos concursos públicos para a provisión de postos de traballo se compute, a efectos de valoración do traballo e os méritos desenvolvidos, o tempo que os candidatos permanecesen en excedencia, redución de xornada e outros permisos establecidos para protexer a maternidade e facilitar a conciliación laboral, persoal e familiar.
Segundo apuntan os socialistas, a pesar de que tanto a Lei de Igualdade como o Estatuto Básico do Empregado Público contemplan esta circunstancia, "tense coñecemento de que non se previu o seu cumprimento no concurso xeral para a provisión de postos de traballo nos servizos periféricos da Secretaría Xeral de Institucións Penais do Ministerio do Interior", convocado o pasado 21 de marzo.
"No mesmo, penalizouse a algunhas funcionarias que pediron unha excedencia para coidar aos seus fillos, xa que ese período non lles conta como traballado e perden por tanto méritos nos concursos de traslado", denuncia a formación no texto da iniciativa.
Para a secretaria adxunta do PSOE, Isabel Rodríguez, asinante da proposta, trátase de algo "ilegal, porque non atende as indicacións da Lei de Igualdade e do Estatuto da Función Pública, pero ante todo é unha inxustiza".
O ESTADO DEBE PROMOVER AS REDUCIÓNS
Segundo explica, "a Lei de Igualdade expresa claramente que a administración xeral do Estado ten que promover excedencias, reducións de xornada ou permisos para favorecer a maternidade e a conciliación".
Ademais, "a Administración está obrigada por Lei a contemplar eses permisos como traballo efectivamente realizado á hora de avanzar na carreira profesional, e por tanto o que se está producindo neste tipo de concursos, nos que que non se está atendendo á Lei, é unha grave inxustiza", insistiu.
Con todo, ao seu xuízo, o Goberno 'popular' está "a penalizar ás funcionarias e funcionarios públicos" que deciden acollerse á excedencia por coidado de fillos.
Escribe o teu comentario