Feijóo, sobre a dimisión de Aguirre: "Fixo o correcto"
O presidente da Xunta destaca sobre a ex concelleira que "sen estar procesada en ningún sumario actuou con coherencia".
O presidente da Xunta, Alberto Núñez Feijóo, manifestou que Esperanza Aguirre fixo "o correcto" e cualificou de "moi oportuna" a súa decisión de dimitir como edila e portavoz do PP no Concello de Madrid, despois das detencións dos últimos días no marco da 'Operación Lezo', entre elas a de Ignacio González, o que fora un dos seus dirixentes máis próximos.
En declaracións aos medios en Bruxelas, Feijóo sinalou que el xa indicou antes da dimisión de Aguirre que entendía que o sucedido tiña "un gran impacto persoal, emocional e político" na dirixente popular.
Por iso, manifestou a súa convicción de que, ao dimitir, "fixo o correcto". Ao seu xuízo, a súa decisión "foi coherente hónraa", xa que, "sen estar procesada en ningún sumario, actuou con coherencia" en relación "aos principios de conduta política".
"Ás veces en política cométense erros por acción e outras por omisión e a culpa de non vixiar coa suficiente intensidade determinadas actuacións presuntas dos seus máximos colaboradores levoulle a tomar esta decisión, que eu creo que é coherente e paréceme moi oportuna", resolveu.
Escribe o teu comentario