Menos do 10% dos gastos das hipotecas corresponden ao banco

A Audiencia Provincial de Oviedo considera que todos os gastos de constitución de hipotecas, excepto os de primeira copia da escritura e os futuros de cancelación ou amortización anticipada, corresponden ao cliente, segundo indicou nunha sentenza con data do pasado 24 de marzo.

En concreto, a Sección 4 da Audiencia Provincial de Oviedo limitou a nulidade das cláusulas de gastos de constitución de hipoteca en contratos de Liberbank a soamente unha parte, inferior ao 10% do total, dos gastos de notaría, rexistro e xestoría, segundo estimacións dos avogados.

Desta forma, valida as cláusulas de obrigación de pago do cliente correspondentes ao Imposto de Actos Xurídicos Documentados e dos gastos de constitución da hipoteca no caso de notaría, rexistro e xestoría.

A orixe do proceso remóntase a 2006, cando o demandante subscribiu un préstamo hipotecario para a compra dunha vivenda habitual con Caja de Ahorros de Asturias (Cajastur), agora Liberbank. O particular demandou á entidade para declarar a nulidade por abusivos dalgúns apartados da cláusula do contrato referida aos gastos.

Concretamente, referíase aos gastos de aranceis notariais e rexistrais relativos á constitución, modificación ou cancelación da hipoteca; os da primeira copia da escritura para a prestamista e, no seu caso, os derivados dos documentos acreditativos das disposicións; os impostos e os gastos de xestoría pola tramitación da escritura ante o Rexistro da Propiedade e a oficina liquidadora de impostos.

O demandante requiría a restitución das cantidades derivada da nulidade das cláusulas, fundamentando a súa petición na normativa sobre protección dos consumidores e nunha sentenza do Tribunal Supremo do 23 de decembro de 2015.

A sentenza relativa a este caso sinala que "é o interesado en obter o crédito quen deberá facer fronte aos gastos que ocasionen aqueles condicionantes que se lle esixen para a súa concesión, salvo que por lei sexan imputables ao prestamista".

Con todo, en relación cos aranceis notariais e rexistrais relativos á expedición da primeira copia da escritura para o prestamista, a Audiencia Provincial indica que "non se explica por qué debe o consumidor correr cos gastos da expedición dunha primeira copia da escritura para o prestamista". "É obvio que esta actuación só beneficia ao banco, que obtén un título executivo, e en nada ao consumidor", engade.

Así, a entidade debería devolver ao cliente uns 80 euros dos 3.850 euros totais cuxa devolución requiría o demandante, segundo estimacións dos avogados. Dese total, 2.850 euros correspondían ao Imposto de Transmisións e Actos Xurídicos Documentados (ITyAJD) e outros 1.000 euros a gastos de notaría, rexistro e xestoría.