Polo menos catro mortos nun accidente dunha avioneta en Lisboa

Polo menos catro persoas morreron ao estrelarse a avioneta na que viaxaban na localidade de Tires, no núcleo municipal de Cascais, preto de Lisboa, segundo informou na súa edición dixital o diario portugués 'Público'.

O rotativo luso explicou que os mortos son as catro persoas que viaxaban a bordo da aeronave. Unha fonte dos bombeiros de Carcavelos confirmou o sinistro, que se rexistrou ás 11.45 horas.

Por motivos que se descoñecen, a avioneta precipitouse contra o terreo e impactou nunha zona próxima a un supermercado. A fonte dos bombeiros dixo que a aeronave chocou contra un camión cando tocou terra. Ata o lugar do accidente desprazáronse 18 vehículos de Protección Civil.

O presidente de Portugal, Marcelo Rebelo de Sousa, foi informado sobre o sinistro e trasladouse ao lugar do accidente.