O alcalde de Cambre rexeita a renuncia do concelleiro de Deportes pola broma ao Celta

O alcalde de Cambre (A Coruña), Óscar García Patiño, confirmou este martes que a Xunta de Goberno Local acordou por unanimidade reprobar a actuación do edil de Cultura, Daniel Carballada, por facer público un comunicado no que, con ton de sorna e ironía, ofrecía ao Real Club Celta trasladarse a un campo nunha parroquia deste municipio.

Nunha rolda de prensa, o rexedor volveu a expresar as súas "desculpas" publicamente ao Concello de Vigo, ao Real Club Celta, aos afeccionados celestes e tamén aos veciños de Cambre por esa nota, distribuída co membrete oficial deste concello coruñés e asinada polo concelleiro de Deportes, Brais Cubeiro.

García Patiño asegurou que xa trasladara persoalmente esa mensaxe ao presidente do club celeste, Carlos Mouriño, quen "aceptou as desculpas e comentou que non facían falta, que entendía que era unha broma e que se sobredimensionou". "Mesmo nos convidou ao palco de Balaídos", engadiu o rexedor, e apuntou que tamén expresou o seu pesar ante o gabinete da alcaldía de Vigo (dado que Abel Caballero estaba ausente por atoparse en Madrid polo acto de despedida a Carme Chacón).

O alcalde de Cambre expresou o seu desexo de "resolver" a polémica suscitada por este escrito, no que se ofrecía ao Celta o campo da Balastreira, ademais dun "galpón" de dous metros cadrados para os trofeos, e desexáballe que seguise sendo "por moitos anos, o segundo club de Galicia". "Este feito tennos que facer pensar na responsabilidade dun representante político", recoñeceu o rexedor.

"ERRO PUNTUAL"

Con todo, puntualizou que Carballada, que asumiu a autoría do escrito (aínda que ía asinado polo edil de Deportes), cometeu un erro "por primeira vez" e "xa pediu desculpas a todos os que se viron afectados".

O propio concelleiro de Cultura, que compareceu co alcalde en rolda de prensa, reiterou a súa petición de perdón por cometer un "erro puntual", que foi o envío dunha nota de prensa con ese ton "desde un departamento oficial".

Segundo Daniel Carballada, esta equivocación "non pode botar por terra o traballo ben feito de varios meses", aínda que recoñeceu que a polémica suscitada pola nota e a "presión mediática" chegoulle a facer pensar en renunciar. "Neste caso, pode a miña responsabilidade con Cambre. Foi unha intención sarcástica, unha broma que non tiña que producirse nunca. Estivo mal feito", insistiu.

Con respecto á situación do concelleiro de Deportes, Brais Cubeiro, que nas últimas horas presentou a súa renuncia polo ocorrido, o alcalde aclarou que pedirá ao concelleiro "que recapacite polo ben dos veciños", e tentará convencelo para que non dimita "porque está a facer un gran traballo e este erro, que nin sequera cometeu el, non pode apartalo da política".

Pola súa banda, o alcalde de Vigo, Abel Caballero, preguntado polos xornalistas acerca desta polémica, limitouse a aseverar: "Hai cousas que eu xa non comento. Creo que (o concelleiro de Deportes de Cambre) xa dimitiu non?".