O futuro da Praza de Abastos ourensá da Ponte, en suspenso ata o luns
As instalacións da Praza de Abastos número dous de Ourense seguen sen uso tras dous intentos infrutuosos de adxudicar a súa concesión.
O pleno extraordinario do Concello de Ourense previsto este mércores para tratar a delegación de competencias ao portavoz de Democracia Ourensá (DO), Gonzalo Pérez Jácome, para concederlle un prazo de catro meses para tramitar a xestión da Praza de Abastos da Ponte, aprazouse ata o vindeiro luns tras a solicitude unánime por parte da oposición.
Todos os partidos coincidiron en reclamar un atraso da sesión tras a entrega á primeira hora da mañá dun informe xurídico do Concello que analiza esta petición. Os portavoces de todos os grupos pediron "tempo para estudar" o documento e coincidiron en criticar a escasa marxe de tempo para analizar este informe.
O pleno fora convocado a instancias de Democracia Ourensana, que propoñía ao alcalde, Jesús Vázquez (PP), que solicitase da Xunta de Goberno Local a delegación da competencia para negociar o futuro da Praza de Abastos número 2 da cidade a favor de Pérez Jácome.
A proposta, para "desbloquear" que as instalacións seguen sen uso "tras dous infrutuosos intentos de adxudicar a súa concesión", solicita un prazo "non superior a catro meses" para que Pérez Jácome "atope" a quen contrate a xestión da praza e "levar a cabo a súa explotación nos termos que ditaminen os técnicos municipais".
O INFORME XURÍDICO
O informe confirma a "posibilidade legal" de delegar a competencia, aínda que destaca que a maior dificultade atópase en que as delegacións se fan para determinado tipo de actuacións, "non con carácter singular e para un expediente concreto".
O texto sinala que "a priori" as negociacións que emprenda Pérez Jácome "son válidas", pero incide en que o expediente "só se pode adxudicar nunha futura licitación", con procedemento aberto e concorrencia.
"Os pactos ou acordos aos que se poida chegar non poden condicionar a licitación posterior", segundo insiste o informe, que lembra que no proceso de licitación non pode chegar ningún candidato cunha "posición de vantaxe".
O informe xurídico é contundente na duración da proposta. O asesor xurídico alerta que a proposición de catro meses "non ten encaixe legal" e que "polo menos é cuestionable", xa que a delegación debería realizarse "ata que o expediente estea rematado".
Escribe o teu comentario