Atopan animais mortos e malnutridos nun alpendre dun veciño de Ponte Caldelas

O Seprona investiga a un veciño de Ponte Caldelas (Pontevedra), como presunto autor dun delito de malos tratos animais, ao consideralo responsable da morte de varios cans e da situación de malnutrición e desatención doutros animais. 

Segundo informaron fontes do Instituto Armado, a investigación iniciouse tras aparecer varios cans mortos nunha zona forestal de Ponte Caldelas. Os axentes localizaron un alpendre feito de forma precaria con paneis e enreixados metálicos e, no seu interior, varios cans extremadamente delgados.

A Garda Civil requiriu a presenza do propietario e comprobou que, no alpendre, había 10 animais de diferentes razas e tamaños, catro deles soltos e o resto atados con cadeas. Ningún dos cans tiña chip de identificación e todos presentaban signos evidentes de desnutrición.

O Seprona tamén comprobou que estaban en condicións hixiénico-sanitarias "deplorables", sen auga nin comida á vista. Ademais, a chabola onde se atopaban tiña elementos cortantes e punzantes que podían danalos, e o chan era un bulleiral de lodo e excrementos.

OUTROS ANIMAIS

Ademais dos cans, os axentes atoparon tamén no alpendre un cabalo e catro ovellas, unha delas morta. Estes animais tampouco estaban identificados e, segundo recoñeceu o propietario, deixara o cadáver da ovella alí "para que a comesen os cans".

No exterior e o interior do cercado localizáronse ósos esparexidos polo chan, entre eles cinco cranios, e os cadáveres de dous cans, un dos cales presentaba unha brecha aberta na cabeza.

Ante esta situación, a Garda Civil requiriu o apoio dos servizos municipais e do equipo veterinario do Centro de Acollida e Protección de Animais (CAAN).

Por outra banda, ante estes feitos, a Benemérita citou como investigado o dono dos animais e trasladou as dilixencias ao xulgado de garda de Pontevedra.

Tamén denunciou por vía administrativa ante a Xunta a este home por varias infraccións en materia de sanidade animal, medio ambiente e xestión de residuos.