Fontàs: "Custaría atopar un adestrador que levase isto coma Berizzo"
O xogador catalán asegura que o Celta pelexa "con toda a ambición do mundo" pola liga e a Europa League.
Co continuo ruxerruxe da posible saída de Berizzo do banco celeste mentres non renove, o persoal desexa que siga. Niso insitiu hoxe Andreu Fontàs. O catalán afirma que "Berizzo é o líder claro deste equipo e como adestrador ten toda a importancia do mundo, ten un mérito importante todo o que está a facer o Celta. Oxalá siga e sigamos crecendo máis".
A del é unha opinión compartida polos compañeiros: "A gran maioría do persoal estaría encantado de que o míster seguise. Se se fose custaría atopar un adestrador que levase isto como o fai el", insistiu.
Sobre o que queda por diante, o central afirma que o afrontan "con toda a ambición do mundo. Non vai ser fácil conseguir todos os retos, pero imos tentar todo: chegar á sétima praza, que temos opcións, e despois na Europa League pasar unha eliminatoria moi dura e tendo en mente que podemos facer historia".
Así, manifestou que "son igual de importantes as dúas competicións". Sobre a participación europea, defende que "cando te afás a xogar dúas veces por semana é moi intenso pero é moi bonito. Fai que todo o mundo estea moi metido".
Tamén dixo estar "ecantando" se volve Nolito ao Celta "como compañeiro dentro do campo e pola relación fóra. Sábeme mal que non estea a ter todos os minutos que un xogador desexa".
Escribe o teu comentario